બાંધછોડ

બાંધછોડ

સરોવર છોડીને પ્યારા! ચાલને પર્વત પરે
   નવકેતન વસવા હવે જુનુ ઘર છોડવું પડે–

 સ્વપ્નને સાકાર કરવા સ્વામિનો સંગાથ હો
   માવતરના   આંગણાની   હુંફને   ખોવી પડે–

 પાઈને   પીવા  સખી!  અમીના  બે  ઘુંટ હો
      વૈરના    ભારી   ભરેલા  વિષને  ધોવા પડે–

   સત્યના  સાતત્યને  આ   દંભના  દેખાવથી
      સાચને   સાંચવી   જાનમ! જૂઠ તારવવું પડે–

    મૃગજળની  મોહિનીથી  મુક્તિનુ  હો  ઉડ્ડયન
     માંયલી   મનજાળને   તપ કરી તોડવી પડે-
——————–

” બાંધછોડ “
Move from Lakes of Brightwater to the Hilly Austin

રુક્ષતા

 

રુક્ષતા

લીલાછમ  ખીલેલા  બાગમાં
અકારણ   વૃક્ષોની   શુષ્કતા
             એવી સાજણ તારી રુક્ષતા

ખુશખુશાલ વારિના  વ્હેણમાં
ધારદાર પથ્થરની તીક્ષ્ણતા
           એવી સાજણ તારી રુક્ષતા

પૂર્ણ   ચંદ્ર ખીલ્યો આકાશમાં
કાળા   વાદળની    નિગ્રહતા
             એવી સાજણ તારી રુક્ષતા

તીરછી    નજરુનાં    ઉમંગમાં
કોરા   નયનોની   નિરપેક્ષતા
           એવી સાજણ તારી રુક્ષતા

 લંબાતો  હાથ  સ્નેહ સ્પર્શમાં
સૂનમૂન  મુઠ્ઠીની    નિશ્ચેષ્ટતા
         એવી સાજણ તારી રુક્ષતા

સુખ-અક્ષર જીવતરના પ્રૃષ્ઠમાં
રુસણાંના    ચેકચાકની    વ્યથા
               એવી સાજણ  તારી રુક્ષતા

——————————————————————

નિખાલસતા

 

નિખાલસતા

 કર્તા  ને  ભોક્તાનો વ્યથિત મનભાવ
અહંકાર  પ્રેરિત   મનવૃત્તિ  પ્રતિભાવ
વિચારોના વમળે ચકરાવે ચિત્તનાવ
દીનહીન    વાસનાને    ડંખે   અભાવ

 અહંમ   ને   અપેક્ષા   અટકાવે   આનંદ
જ્યમ,કંટક હો કંઠમાં, ભોજન બેસ્વાદ
‘ હું ‘   સાંચો   સતવાદી    વિતંડાવાદ
સ્વાભિમાન   નામે    વૈર  ને  વિખવાદ

 વિક્રાંતિક   વાણીમાં   અક્ષર  મૂલવાય
શબ્દોના   અર્થોમાં    પંડિત    અટવાય
મિતભાષી નમ્ર ગુણી વ્હાલથી મલકાય
સ્વચ્છ સ્ફટિક અંતરમાં ભક્તિ છલકાય