ચતુરા

10 Dec 2011 3 Comments

by SARYU PARIKH in કાવ્યો

ચતુરા

કોને  કહું કે  એમને,  સમજણ  કશી પડતી નથી,
દુન્યવિ આ ગતરમતની, ગતાગમ પડતી નથી.

જાય ત્યાં ત્યાં આપી આવે નવ નવા એ ઉપરણાં,
શું આપવું, ના આપવું, એ  ગતાગમ પડતી નથી.

કો’ આવીયા  આંગણ   ઉભાને,  આવકારે દોડતા,
પોતા-પરાયા ભેદની,સમજણ કશી પડતી નથી.

માંગે, વગર માંગે એ બસ,  આપે  સહુને પ્રેમથી,
ભેગુ  કરીને  રાખવાની,   ગમ કશી પડતી નથી.

ભલાઈ  ભોળપ સાદગી, કહે “જેમ છે તે ઠીક છે,”
દેખાવ  સારો  કેમ કરવો, ગતાગમ પડતી નથી.

જગ  નવાજે  એમને  અતિ માનથી સન્માનથી,
પણ  હું ચતુરા જાણુ  કે એને સમજ  પડતી નથી.
————–

ઉમદા, ઉદાર અને સરળ સજ્જનના, ચતુર પત્નીની મનોદશા.
એક કટાક્ષકાવ્ય.
અહીં નરસિંહ મહેતા જેવા વ્યક્તિ અને દુનિયાદારીને મહત્વ આપતી પત્નીની વાત છે.