મૌનનો મહિમા…સરયૂ પરીખ

મૌનનો મહિમા

તીખા ને કડવા અધીરા એ વેણ,
 તેજીલી ધાર પર કજીયાના કહેણ.
એ જ હો જીવ્હા, પણ મીઠેરાં ભાવ,
ગમતી ગંગાનાં મનગમતા વહેણ.

ઓછું બોલવામાં અહોય અષ્ટ ગુણ,
સોચી સમજીને જાળવશે સમતુલ,
ભૂલો છૂપાયે ને સચવાયે મૂલ,
માન સખી, ઓછું બોલ્યાંનાં અષ્ટગુણ.

સૌ કહેતા, ન બોલવામાં નવ ગુણ,
શાંત સરોવર સમાવે અવગુણ.
વાત હશે સાચી સ્થિર ચેતનાની સાથ,
ન બોલવામાં ખરે લાગે નવ ગુણ.

મૌન સંગીત જે અંતરથી ઊગે ને,
વણબોલ્યે વેરે ખુશી મંજુલ તરંગ.
શાતા ને સાંત્વના લયબધ્ધ લહેકે,
અંતરમન મૌનનાં દસેદસ ગુણ.

ખરું મૌન મહાતમ જે મસ્તકમાં રાજે,
ઘટ ઘટમાં આનંદની ઘંટી બજાવે.
——

painting by Dilip